សមិទ្ធិករភាពយន្តវ័យក្មេង សាន ដាណិច បានឱកាសពីមហោស្រពភាពយន្តទីក្រុងកាន ផលិតភាពយន្តខ្នាតវែងដំបូងរបស់ខ្លួន

ស្ថានទូតបារាំងប្រចាំកម្ពុជា កាលពីព្រឹកថ្ងៃទី២៤ ខែមេសា ឆ្នាំ២០២៤ បានប្រកាសថា សមិទ្ធិករភាពយន្ត សាន ដាណិច ត្រូវបានមហោស្រពភាពយន្តទីក្រុងកាន ជ្រើសរើសឱ្យទៅបំពេញការងារលើការតែងនិពន្ធ និងការថតភាពយន្តខ្នាតវែងដំបូងរបស់ខ្លួន នាទីក្រុងប៉ារីស ជាមួយនឹងសមិទ្ធិករភាពយន្តអន្តរជាតិ ៥រូបផ្សេងទៀត។

ប្រភពដដែលបញ្ជាក់ថា ដោយមានការគាំទ្រពីក្រុមបារាំង កញ្ញា សាន ដាណិច នឹងទៅ និងស្នាក់នៅទីក្រុងប៉ារីស រហូតដល់ថ្ងៃទី៣១ ខែកក្កដា ដើម្បីបំពេញការងារលើការតែងនិពន្ធ និងការថតភាពយន្តខ្នាតវែងដំបូងរបស់ខ្លួន ដែលមានចំណងជើងថា « To Leave, To Stay » ដោយទទួលបានការជួយ​​ជ្រោម​​ជ្រែង ទាក់ទងនឹងសាច់រឿង។ ក្នុងដំណើរទៅកាន់ទីក្រុងប៉ារីសអំឡុងនេះ កញ្ញា ដាណិច ក៏នឹងជួបជាមួយសមិទ្ធិករនានា ក៏ដូចជាអ្នកប្រកបអាជីពក្នុងវិស័យ​ភាព​យន្ត រួមនិងតំណាងស្ថាប័នភាពយន្តផងដែរ។

គួររំលេចបន្តិចថា កញ្ញា សាន ដាណិច ជាអ្នកខេត្តបាត់ដំបង សិក្សាជំនាញ Interior Design និងបានចូលបំពេញការងារក្នុងវិស័យនេះ ចាប់តាំងឆ្នាំ២០១៥ មក ក្នុងនាមជាសមិទ្ធិករភាពយន្ត និងអ្នកដឹកនាំភាពយន្តខ្នាតខ្លី។ កាលពីចុងឆ្នាំ២០១៨ តាមរយៈការចាប់ផ្តើមផលិតភាពយន្តខ្នាតខ្លីដំបូង រឿង «មួយលានឆ្នាំ» សមិទ្ធិកររូបនេះ ទទួលបានពានរង្វាន់ភាពយន្តខ្លីល្អបំផុតប្រចាំអាស៊ីអាគ្នេយ៍ ពីមហោស្រពភាពយន្ត Singapore International Film Festival (SGIFF) លើកទី ២៩ នៅប្រទេសសិង្ហបុរី និងត្រូវបានចាំងបញ្ចាំងនៅប្រទេសជាង ២០ ឯណោះ។ បន្ទាប់ពីស្នាដៃទី១ កញ្ញា សាន ដាណិច ក៏ជោគជ័យលើស្នាដៃ ភាពយន្តខ្នាតខ្លីផ្សេងទៀត រឿង «ថ្ងៃរះក្នុងចិត្ត» ក្នុងឆ្នាំ២០២០ និងមានស្នាដៃភាពយន្តឯកសារខ្នាតខ្លី មួយផងដែរ គឺរឿង «ឧទ្យានសមុទ្រ» ៕