បើនិយាយពីការនិទានដ៏រស់រវើកនិងជក់ចិត្ត អ្នកអានច្បាស់ជានឹកភ្នកដល់ប្រលោមលោកដែលរមែងអានជារឿយៗ ហើយបើរំឭកដល់ប្រលោមលោកមនោសញ្ចេតនា ប្រាកដណាស់មិត្តអ្នកអានជាច្រើនមិនអាចរំលងបានឡើយ នូវភាគនិទានដ៏លន្លង់លន្លោចរបស់អ្នកនិពន្ធ ម៉ីសន សុធារី ដែលបានខាបយកដួងចិត្តមិត្តអ្នកអានជាច្រើន ឲ្យស្រមើស្រមៃដល់តួអង្គប្រុសដ៏ស្រស់សង្ហា។
ទន្ទឹមគ្នានេះដែរ ប្រលោមលោកមនោសញ្ចេតនារបស់អ្នកនិពន្ធរូបនេះ ធ្លាប់ត្រូវអ្នកអានសរសើរមិនដាច់ពីមាត់ក្នុងចំណោមយុវវ័យដែលជាស្រលាញ់ចូលចិត្តការអាន ខណៈប្រលោមលោកផ្សេងទៀត អ្នកគាំទ្រទទូចឲ្យបោះពុម្ភជាសៀវភៅឆាប់ៗ។
នេះគឺជាប្រលោមលោកមនោសញ្ចេតនា ៦ ចំណងជើង ធ្លាប់បានអង្រួនដួងចិត្ត និងកក់ក្ដៅដល់បេះដូងអ្នកអានកន្លងមក ពិសេសក្រុមយុវវ័យឲ្យលន្លង់លន្លោចទៅតាមសាច់រឿង។
១ ថ្ងៃមុនស្អប់ថ្ងៃនេះស្រលាញ់
ភាគនិនានដ៏ល្អឯកពីអ្នកនិពន្ធ ម៉ីសន សុធារី ធ្លាប់កក្រើកលើវេបសាយឌីជីថលសប្បាយកាលពីប៉ុន្មានឆ្នាំមុន។ ត្បិតថារឿងនេះមានវ័យចំណាស់ និងបានបោះពុម្ពជាសៀវភៅក្ដី។ ប៉ុន្តែមកទល់ពេលនេះ “ថ្ងៃមុនស្អប់ថ្ងៃនេះស្រលាញ” នៅតែជាប្រលោមលោកល្អឯក បំភ្លេចមិនបានពីសំណាក់អ្នកគាំទ្រជាច្រើន។
២ ស្រទន់មន្តស្នេហ៍
ភាគនិទានស្នេហាដ៏ស្រទន់ ទទួលបានការគាំទ្រយ៉ាងភ្ល្លូកទឹកភ្លូកដីកាលពីឆ្នាំ២០១៧ លើវេបសាយសប្បាយ និង ធ្លាប់សម្រាយជាភាពយន្តល្អឯកលើកញ្ចក់ទូរទស្សន៍CNT កាលពីឆ្នាំ២០១៨ ហើយថែមទាំងមានអ្នកទស្សនាជាច្រើនថែមទៀត។ ទោះយ៉ាងណា នៅឆ្នាំ២០២៣ ស្រទន់មន្តស្នេហ៍ បានសម្រេចចេញជាសៀវភៅក្រោមការស្នើសុំពីអ្នគគាំទ្រប្រលោមលោកលោមចិត្តមួយនេះ។
៣ កិច្ចសន្យាស្នេហាយើង
ប្រលោមលោកមនោសញ្ចេតនា “កិច្ចសន្យាស្នេហាយើង” ដែលធ្លាប់ចេញផ្សាយកាលពីឆ្នាំ ២០១៣ ពេលនេះហ្វេនៗរិតតែសប្បាយចិត្តខ្លាំងជាងមុន បន្ទាប់ពីបានដឹងថា រឿងស្នេហាកក់ក្ដៅរវាងកូនប្រុសទោលនៃត្រកូលអ្នកនយោបាយនិងគ្រូបង្វឹកបង្ហាញម៉ូដ បានលេចចេញជាសៀវភៅហើយកាលពីពេលថ្មីៗនេះ។
៤ ទោះស្នេហ៍ឆ្ងាយហួសជើងមេឃ
គូស្នេហ៍កញ្ញាសន្យានិងទេវបុត្រ Lorenzo បន្សល់ស្លាកស្នាមស្ថិតស្ថេរក្នុងបេះដូងនៅឡើយ។ ទោះស្នេហ៍ឆ្ងាយហួសជើងមេឃ ជាប្រលោមលោកស្នេហារបស់តួឯកស្រីដែលមានភក្ដីភាព ត្បិតថា Lorenzo បានបាត់បង់ការចងចាំក្ដី ប៉ុន្តែភក្ដីភាពរបស់សន្យា នៅតែចងចាំ នៅតែរលឹកពីស្នេហាដែលនាងមានចំពោះភាគីម្ខាងទៀតដដែល។
៥ បេះដូងមេគង្គ
រឿងស្នេហាពីកម្លោះឌូបៃនិងប្អូនថ្លៃស្រីមកខេត្តស្ទឹងត្រែង បានអង្រួនដួងចិត្តមិត្តអ្នកអានដែលបានអានប្រលោមលោកមួយនេះ សុទ្ធតែសរសើរដូចៗគ្នា។ ជាមួយគ្នានោះដែរ សូម្បីតែតារាប្រុសបឺរីក៏ទាក់ចិត្តចង់ក្លាយជាតួឯកប្រុសក្នុងរឿង “បេះដូងមេគង្គ” ស្របពេលដែលកាលណោះលោកបានលើកសរសើរថា ជាសៀវភៅដែលអានស្លុងអារម្មណ៍ខ្លាំងបំផុត។
៦ ស្រលាញ់បងជ្រៅជាងសមុទ្រ
ប្រលោមលោកភាគបន្តពី បេះដូងមេគង្គ បានបន្តប្រទាក់ប្រទងគ្នាធ្វើឲ្យអ្នកអានរិតតែចង់ដឹងខ្លាំងពីប្រវត្តិពិតរបស់បុត្រាច្បងសេដ្ឋីដែនកោះក្នុងរឿង ស្រលាញ់បងជ្រៅជាងសមុទ្រ។ ភាគនិនានដ៏វិសេសមួយនេះ ក៏ត្រូវអ្នកគាំទ្រទទូចឲ្យមានភាគបន្ត បន្ទាប់ពីស្នេហាកម្លោះកូនច្បងនិងប្អូនប្រុសម្ចាស់កោះជាប់ជំពាក់ចិត្តលើមនុស្សស្រីតែមួយ៕
កញ្ញា គ្រាប់ជី
យល់យ៉ាងណាដែរចំពោះសាច់រឿងខាងលើ